Te Kete Ipurangi Navigation:

Te Kete Ipurangi
Communities
Schools

Te Kete Ipurangi user options:


eZ Publish navigation


You are here:

Matariki: Aratohu mā te pouako

Ka kapi katoa i runga i tēnei whārangi ngā take e whai ake nei. Ki te heke haere ki tētahi pūtake, pāwhiria te hononga e hāngai ana:

Kōrero whakataki

Nau mai ki ngā aratohu pouako e pā ana ki te tauwhitiwhitinga o 'Matariki', i runga i a Te Kete Ipurangi. He wā tēnei hei mahere, hei ako, hei tuari whakaaro, hei whakaata i ngā mahi kua oti, ki te whakanui i ngā rā e heke mai ana. E whakarato ana ēnei aratohu i ngā whakaaro, ā, e tautoko ana i te whakaurutanga o te tauwhitiwhiti 'Matariki', ki te whānuitanga o te hōtaka o te akomanga mō Matariki.

Arā noa atu ngā huarahi e whakaurua ai tēnei rauemi ki te whānuitanga o ngā hōtaka akomanga e pā ana ki ngā kaupapa mahere, ako, tuari whakaaro, te whakaata i ngā mahi kua oti, ki te whakanui hoki i ngā rā e heke mai ana.

Anei ngā āhuatanga ka akohia e ngā ākonga i te tauwhitiwhiti o 'Matariki':

  • Ko te tāutu i te tātai arorangi o Matariki i ngā pō.
  • Ko te wā o te tau e noho ai a Matariki i te ata hāpara.
  • Ko te hiranga o te maramataka Māori, ki te oranga o te iwi Māori.

Me pēhea tō whakamahi i ēnei aratohu

I hoahoatia tēnei tauwhitiwhiti o 'Matariki' hei whakaurunga ki te whānuitanga o te hōtaka akomanga mō Matariki. E whakarato ana ēnei aratohu i ngā:

  • hononga ki ngā marautanga
  • kupu hou
  • rerenga kōrero
  • wheako
  • tauira me ngā tohu aromatawai
  • hononga ki ētahi atu rauemi mō Matariki.

Me whai āwhina koe mā te pānui i ngā pārongo whakamārama mai i ngā hononga mai i ēnei o ngā aratohunga, i mua i te kōkuhutanga o te take o Matariki ki ō ākonga.

Me whakamātau koe i ngā mōhiotanga o ngā ākonga e pā ana ki a Matariki me ētahi atu o ngā tātai whetū. Ka taea te whakamahi i te tukanga whakaaro, mahi takirua, mahi tuari hoki.

Ka taea hoki tō whakaputa pūrākau me ngā ākonga ki te kōkuhu atu i te kaupapa nei. E tuari ana te pukapuka Matariki nā M. Drewery, 2003, Reed Publishing o Tāmaki Makaurau, i ngā momo pūrākau katoa e pā ana ki ngā tikanga Māori, ā, e hāngai ana ki te tātai whetū o Matariki. E wātea ana i roto i te reo Ingarihi, me te reo Māori hoki.

Kia kōkuhu rā anō te kaupapa nei, kātahi anō koe ka āhei ki te whakauru i te tauwhitiwhitinga o 'Matariki' ki roto i te hōtaka.

He whakarato i ngā momo kupu hou e noho tauhou ana ki ngā ākonga, mā te tuhi i ngā kupu nei ki te papa tuhituhi, me te whakauruuru haere ki ngā whakawhitinga kōrero i te taha o ngā ākonga. Kua whakaratoa hoki tētahi rārangi kupu hou.

Ngā whāinga paetae

Whenu: Ō Ahupūngao (marautanga tawhito)
Taumata: Te Aka

Ka taea e te ākonga te:

  • whakamahi ētahi pūrere hangarau hei mātakitaki, hei whakaahua hoki i a Ranginui
  • tūhura me te whakamahi tauira e whakaatu ana i ngā hononga mokowā o Papatūānuku ki te Marama me Tamanuiterā, me te mōhio hoki ki ngā tirohanga o ngā tāngata whenua i a rātou e whakamahi ana i ēnei mātauranga hei ine i te haerenga o te wā.

Pūtaiao i Roto i te Marautanga o Aotearoa (marautanga tawhito).

Whenu: Te Ao Tūroa (marautanga hou)
Taumata: Te Aka

Ranginui
5. Ka ako haere i nga wahanga o te whānau a Tama-nui-te-rā, tae atu ki ngā aorangi me ō rātou marama, e mārama haere ai ki ngā tawhiti, ki ngā āhuatanga hoki e pā ana ki te toro ātea.

Te Marautanga o Aotearoa: Pūtaiao.

Ngā kupu hou

Kei raro nei ētahi pū kupu ka kitea e ō ākonga i te wā e whakamahia ana e rātau tēnei tauwhitiwhiti, i te wā e whakamātau ana i ngā tūmahi kua whakaritea.

Ata hāpara dawn
Huahua gourd
Huripoki turn over
Kāhui whetū constellation
Karikari dig
Kati barrier, boundary
Kōiwi bones
Korokoro lamprey
Kōtata close
Kōtutu reserve
Kupu kore missing word
Māhanga snare
Mahere tātai whetū star map
Maramataka calendar
Meka matua basic facts
Ngaki(a) clear off weeds
Pēhi(a) press/click
Raua place
Rua parapara rubbish dump
Tao spear
Whakatōtanga planting

Ngā ingoa o ngā whetū, me ngā kahui whetū

Autahi Canopus
Matariki Pleiades
Puanga Rigel
Puanga-hori Procyon
Pūtara Betelguese
Ruawahia Arcturus
Rehua Antares
Takurua Sirius
Taumata-kuku Aldebaran
Tautoru Orion's belt
Te Kakau Regulus
Te Matau a Māui Tail of Scorpius
Whakaahu Castor

Ngā rerenga kōrero

Ko ngā rerenga kōrero hou ka taea te whakamahi e ngā ākonga, pērā i te:

  • Ka nanawe ahau i te kitenga atu ....
    I was very excited to find ....
  • Ka taea te whakamahi i tēnei whakataukī/mahere tātai whenua/maramataka hei ....
    This proverb/star map/Māori calender can be used to ....
  • Ko tā te tangata whenua nō ....
    According to people from ....
  • I tēnei mahere tātai whetū, ka taea te kite/whakaatu ...
    In this star chart, you can see ....
  • E kōtata ana atu a Matariki ki a ....
    Matariki is very close to ....

Ngā wheako

Ka taea e ngā ākonga:

  • te hoaoha mahere tātai whetū, e whakaatu ana ki hea takoto ai a Matariki i ngā pō, i ngā wāhanga rerekē o te tau
  • te whakareri i tētahi pūrongo e whakaatu ana i pēhea te whakamahi i te maramataka Māori, me ngā kaupapa pū o te wā o Matariki
  • te hoahoa kari mihimihi ki te whakanui i te kaupapa o Matariki, e uru pai ai ngā whakataukī o roto o te tauwhitiwhitinga o 'Matariki'
  • te tūhura i ngā momo pūrākau me ngā ingoa mai i ētahi atu ahurea e pā ana ki a Matariki.

Ētahi atu wheako

  • Te rapu i ngā āhua a ngā whetū me te hanga i tōu ake tātai whetū i runga i tō mahere tātai whetū. Mā ngā ākonga e whakaingoa i a rātau ake tātai whetū, me te hanga hoki i a rātau ake pūrākau mō taua tātai whetū rā.
  • Te tūhura i ngā whakataukī o roto i te tauwhitiwhiti o 'Matariki'. Ka tūhurahia hoki e ngā ākonga ngā whakataukī me te whakauru haere ki roto i te akomanga. Te whakawhiti kōrero mō te pānga o ēnei tūāhua ki ngā mahi o nāianei i roto o Aotearoa.
  • Te whakarite hākari e tohu ana i te otinga o te tau tawhito, me te urunga mai o te tau hou.
  • Te tā i tētahi mahere mō tētahi māra koanga i te kura, te kohikohi hoki i ētahi kākano, i ētahi whakatipu hoki.

Ngā tauira aromatawai

Ka taea e ngā pouako me ngā ākonga te aromatawai i a rātau ake waiatanga ki:

  • te tūhura me te whakamahi tauira e whakaatu ana i ngā hononga mokowā o Papatūānuku ki ngā whetū, ā, ki hea hoki a Matariki takoto ai i ngā wāhanga o te tau
  • te pō, e taea e ngā ākonga te tūhura i ngā momo āhuatanga o te ātea.

Ngā tohu aromatawai

  • Kua taea e te ākonga te taumata o Te Aka mēnā, ka matatau ki te whakamahi i ētahi taputapu ine hei tautoko i ngā mātakitaki, ki te whakaatu rānei i tōna mōhio ki te ine rahinga.

E hāngai ana tēnei ki te whāinga paetae o te marautanga tawhito: ka taea e te ākonga te whakamahi ētahi pūrere hangarau hei mātakitaki, hei whakaahua hoki i a Ranginui.

  • Kua taea e te ākonga te taumata o Te Aka mēnā, ka matatau ki te tuhi i tāna i mātakitaki ai, i tāna i ine ai.

E hāngai ana tēnei ki te whāngai paetae o te marautanga tawhito: ka taea e te ākonga te tūhura me te whakamahi tauira e whakaatu ana i ngā hononga mokowā o Papatūānuku ki te Marama me Tamanuiterā, me te mōhio hoki ki ngā tirohanga o ngā tāngata whenua i a rātou e whakamahi ana i ēnei mātauranga hei ine i te haerenga o te wā.

E hāngai hoki ana ēnei tohu aromatawai ki te whāinga paetae o Te Marautanga o Aotearoa: Pūtaiao – Whenu: Te Ao Tūroa. Taumata: Te Aka.
Ranginui
5. Ka ako haere i ngā wāhanga o te whānau a Tama-nui-te-rā, tae atu ki ngā aorangi me ō rātou marama, e mārama haere ai ki ngā tawhiti, ki ngā āhuatanga hoki e pā ana ki te toro ātea.

Ngā hononga e hāngai ana

Tauira mahere tātai whetū

https://teara.govt.nz/en/diagram/2222/maori-star-compass

Pārongo o te maramataka Māori

http://www.maori.org.nz/faq/showfaq.asp?fldAuto=9

Ngā rauemi

https://www.tetaurawhiri.govt.nz/assets/LanguageResources/478ca2f8d3/MatarikiBooklet.pdf

Ngā pārongo mō Matariki

http://www.museumswellington.org.nz/space-place/ 

http://www.hana.co.nz/summer_notes.pdf

https://www.tepapa.govt.nz/learn/for-educators/teaching-resources/matariki-classroom-resources




Footer: